Տերևատ. ՀՀ Բույսեր

Տերևատ (լատ.՝ Dáphne), գայլահատ, դափնյակ, գոճմակ, գայլախոտ, գոճմակազգիների (Thymelaeaceae), ընտանիքի մշտադալար կամ տերևաթափ թփերի ցեղ։

Տարածում
Տարածված է Արագածոտնի, Շիրակի, Լոռու, Տավուշի, Գեղարքունիքի, Սյունիքի և այլ մարզերի միջին և վերին լեռնային գոտիներում, ենթալպյան նոսրանտառներում։ Աճում է խոնավ և ստվերոտ վայրերում, քարքարոտ թեքությունների վրա և այլ վայրերում։

Կենսաբանական նկարագիր
Ցողունը գորշավուն կեղևով է, տերևակոթունների հետքերով ծածկված ճյուղերով, բարձրանում է՝ 50 սմ-ից մինչև 1,5 (2, երբեմն՝ 3) մ։ Տերևները թույլ թավոտ են, հերթադիր կամ հակադիր, մանր, երկարավուն-էլիպսաձև, կաշեկերպ։ Ծաղկաբույլը գլխիկանման է կամ ողկուզանման, ծաղիկները՝ երկսեռ, սպիտակ, վարդագույն կամ դեղին, տհաճ հոտով։ Ծաղկում է մայիս-հուլիսին։

Տեսակներ
Հայտնի է մոտ 100, ՀՀ-ում՝ 5 տեսակ՝

• Տերևատ անդրկովկասյան (D. transcaucasica),
• Տերևատ լերկատերև կամկնձիկավոր (D. glomerata),
• Տերևատ սովորական (անտառային) կամ մահացու (D.mezereum),
• Տերևատ կովկասյան (D. caucasica),
• Տերևատ նեղսրտերև (D. angustifolia)։

Նշանակություն
Պտուղը վառ կարմրավուն, թունավոր, հյութալի կորիզապտուղ («հատապտուղ») է։ Դեղաբույս է, պարունակում է գլիկոզիդներ, ճարպայուղ, շաքար, սապոնիններ, դեղին ներկանյութ և այլն։ Պատրաստուկները (պտղի և կեղևի) օգտագործում են խիթերի, ստամոքսաղիքային և մաշկային որոշ հիվանդությունների, հոդաբորբերի (ռևմատիզմ, պոդագրա), այտուցների ժամանակ։ Գեղազարդիչ է և մեղրատու։