Էդմոն Մարուքյանը՝ որսով զբաղվող քաղաքացիների պաշտպան

ՀՀ ԱԺ պատգամավոր Էդմոն Մարուքյանը նամակով դիմել է Շրջակա միջավայրի նախարար Էրիկ Գրիգորյանին՝ պնդելով, որ որսորդությամբ զբաղվելու կարգի փոփոխությունն անհիմն է ու ենթակա վերանայման: Էդմոն Մարուքյանը մասնավորապես գրում է․ «Ի պաշտպանություն որսով զբաղվող քաղաքացիների իրավունքների, երկու օր առաջ՝ օգոստոսի 13-ին, դիմել եմ ՀՀ շրջակա միջավայրի պաշտպանության նախարար Էրիկ Գրիգորյանին։

Իմ կողմից բազմակողմանիորեն հիմնավորվել է որսի թույլտվության տրամադրման փոփոխությունների անընդունելիությունը և վտանգավորությունը։

Մասնավորապես՝

Մի կողմից 7,5 անգամ լիցենզիայի արժեքն է ավելացել, 3,5 անգամ էլ որսով զբաղվելու օրերի քանակն է պակասել։

Մյուս կողմից, որոշումը հղի է բազմաթիվ վտանգներով, քանի որ շաբաթական 7 օր որս անելու փոխարեն միայն հանգստյան օրերին որս թույլատրելով` համապատասխան վայրերում որսորդների և մեքենաների կուտակումը բազմապատկվելու է։ Եվ հաշվի առնելով այն հանգամանքը, որ տարեկան մի քանի տասնյակ հազար արտոնագիր է տրվում որսի համար, ակնհայտ է դառնում, որ անվտանգության ապահովումը մեծ խնդիր է դառնալու հանգստյան օրերին։

Եղանակային պայմաններն էլ ամբողջ շաբաթ կարող են բարենպաստ լինել, իսկ հանգստյան օրերին՝ ոչ։

Որոշումը խտրական է այն անձանց համար, ովքեր աշխատում են միայն կամ նաև հանգստյան օրերին:

Ի վերջո, որսի սեզոնին չվող թռչուններին չորսալու դեպքում նրանք չվում են այլ երկրներ, որտեղ նրանց որսում են սահմանված կարգով, մինչդեռ նրանց կարելի է որսալ Հայաստանում և ունենալ համապատասխան եկամուտներ։

Հաշվի առնելով վերոշարադրյալը՝ առաջարկել եմ որսի արտոնագրի տրամադրման գործող կարգը թողնել անփոփոխ:

Սպասենք նախարարի որոշմանը ․․․»։ 

Հիշեցնենք, որ որսորդությամբ զբաղվելու կարգի փոփոխությամբ նախատեսվում է բարձրացնել ամենամյա արտոնագրի արժեքը, ինչպես նաև որսորդությամբ զբաղվել միայն շաբաթ և կիրակի օրերին։ Փոփոխություններն առաջացրել են որսով զբաղվող քաղաքացիների դժգոհությունը։

Օրացույց
Ամենադիտված
Այսօր
Այս շաբաթ
Այս ամիս
Մենք Facebook-ում