Սպանված արջ, մուֆլոն և բեզոարյան այծ. «արգելված որսի» հերթական դեպքը (ֆոտո)

EcoNews.am բնապահպանական տեղեկատվական կայքը շարունակում է ներկայացնել ապօրինի որսի դեպքերի մասին վկայող լուսանկարներ և այլ մանրամասներ: Այս անգամ խոսքը վերաբերում է խոշոր կենդանիների որսի «իսկական սիրահար», արտասահմանաբնակ անձնավորությանը, ով սիրում է ժամանակ առ ժամանակ վերադառնալ հայրենիք և զբաղվել «արգելված որսով», այդ թվում նաև Կարմիր գրքում գրանցված կենդանիների:

45-ամյա Տիգրան Խաչատրյանի համացանցային հասանելի տվյալների վերլուծության արդյունքում պարզվեց, որ վերջինս մշտական բնակություն է հաստատել Գերմանիայում: Ներկայացնենք 2014թ.-ին նրա կողմից բեռնված մի քանի լուսանկար, որտեղ սպանված է արջ, բեզոարյան այծ և մուֆլոն:

Ցուցադրված լուսանկարները համացանց բեռնելու օրը (09/11/2014թ.) Տիգրան Խաչատրյանը լուսանկարներ է բեռնել նաև Բախչալարից (Բախչալարը ներկայիս Բագարան համայնքի պատմական անվանումն է, որը գտնվում է Արմավիր մարզում, մարզկենտրոնից 39 կմ հարավ-արևմուտք), հայ-թուրքական սահմանից:

Նշենք, որ բեզոարյան այծը գրանցված է նախկին ԽՍՀՄ-ի Կարմիր գրքում: Տեսակն ընդգրկված է նաև IUCN Կարմիր ցուցակում (ver. 3.1) «Vulnerable A2cd» կարգավիճակով: ԲՊՄՄ Կարմիր ցուցակի չափորոշիչներով գնահատվում է որպես «Վտանգված» տեսակ: Ներկայիս գնահատմամբ` բեզոարյան այծի թվաքանակը Հայաստանում կազմում է 1000-1500 առանձնյակ: Պահպանվում է «Խոսրովի անտառ» և «Շիկահող» արգելոցներում, «Արևիկ» և «Սևան» ազգային պարկերում, «Զանգեզուր» արգելավայրում և Հարավային Հայաստանի մի շարք այլ արգելավայրերում:

Հայկական մուֆլոնը ևս գրանցված է ՀՀ Կարմիր գրքում, ինչպես նաև ներառված է IUCN Կարմիր ցուցակում «Vulnerable A2cde» կարգավիճակով և ցուցակի չափորոշիչներով ենթատեսակը գնահատվում է որպես «Վտանգված»: Ներկայիս գնահատմամբ՝ մուֆլոնի թվաքանակը Հայաստանում չի գերազանցում 250-300 առանձնյակները: Պահպանվում է «Զանգեզուր» արգելավայրում և «Արևիկ» ազգային պարկում:

Որսված կենդանիները, հավանաբար, հետագայում տեղ են գտել նշված մարդու «անձնական հավաքածուի» մեջ, ինչի մասին վկայում են հետևյալ լուսանկարները:

Նշված անձի հաջորդ ուշագրավ լուսանկարը Հայաստանից բեռնվել է 2015թ.-ին: Լուսանկարում վերջինս անձամբ նշել է, որ Հայաստանում է քարայծի (բեզոարյան այծ) որսի նպատակով:

Դատելով լուսանկարներից, վերջինս հավանաբար Հայաստան է այցելել նաև այս տարի՝ սեպտեմբեր ամսին:

Ավելացնենք, որ արտասահմանում բնակվող մեր հայրենակիցը որսով է զբաղվում նաև Եվրոպայում: Ներկայացնենք մի քանի լուսանկար, որտեղ վերջինս անձամբ է մորթում որսած այծյամին:

Ինչպես հայտնի է, Եվրոպայում որսի թույլտվություն ստանալու կարգն ու դրա համար սահմանված վճարներն ահռելիորեն տարբերվում են ՀՀ չափորոշիչներից: Այսպիսի որսի մասնակից լինելն այնքան էլ փոքր «հաճույք» չէ:

Եղանակի տեսություն
Օրացույց
Մենք Facebook-ում