Ահազանգ․ կարմիրգրքյան տրիտոնների վաճառք՝ Երևանի շուկաներից մեկում (ֆոտո)

«Արդեն որերորդ տարին է, որ Երևանի թռչնաշուկայում գարնան երկրորդ կեսից մինչև ամռան կեսը վաճառվում են փոքրասիական տրիտոններ, որոնց որսը և վաճառքն արգելված են օրենքով»,– այս մասին գրել է Կենսաբանական գիտությունների դոկտոր, պրոֆեսոր Սամվել Պիպոյանը՝ շարունակելով,– «Անցած տարի վաճառողների շրջանում տարվել է բացատրական աշխատանք, որ այդ պոչավոր երկկենցաղները գրանցված են Կարմիր գրքում, որ չի կարելի նրանց որսալ, առավել ևս վաճառել, որ դա կարող է վարչական տույժի հանգեցնել, միևնույն է՝ վաճառում են։

Վերջինս գրել է, որ մարտի 26-ին ականատես է եղել, որ մի փոքրիկ դույլի մեջ շուրջ 40-50 տրիտոն են վաճառվում, որոնք շատ նիհար են եղել ու եթե շտապ միջոցներ չձեռնարկվեն նրանց անհրաժեշտ խնամք տանելու, բոլորն էլ կարող են մահանալ կարճ ժամանակ հետո։

«Պետական ո՞ր մարմինն է ի զորու արգելելու Կարմիր գրքում գրանցված կենդանիների անօրինական առքն ու վաճառքը։ Եթե բնապահպանության ու ընդերքի պետական տեսչությունը, ապա ինչ կոնկրետ քայլեր նա կարող է անել։ Անցած տարիների իմ կարծիքն այն է, որ տվյալ վերհսկող մարմինն այս գործում կարծես վախվորած է։ Գուցե օրենսդրական հիմքերի խնդիր կա»,– եզրափակել է նա։

Փոքրասիական տրիտոնը վարում է գլխավորապես մթնշաղային ու գիշերային կենսակերպ։ Սնվում է հիմնականում մանր անողնաշարավորներով։ Ձմեռում է ցամաքում՝ աշնան վերջից գարնան սկիզբը։ Զուգավորումը տեղի է ունենում գարնանը։