Հայտնաբերվել է ՀԷԿ պատվարի փլուզումից Աղստև գետն ընկած քաղաքացու դին

ԱԻՆ-ը հաղորդագրություն էր տարածել, ըստ որի՝ գիշերը, ժամը 00.05-ի սահմաններում, «Իջևանի բետոնիտ կոմբինատ» ԲԲԸ-ի մոտակայքում գտնվող «Քարավարտ» ՍՊԸ ՀԷԿ-ի ջրի կարգավորիչ շերտափեղկերի կողային պատվարը և դիմային պատվարը փլուզվել էին, ինչի հետևանքով «Քարավարտ» ՍՊԸ-ի աշխատակից Վ. Գ.-ն (1969թ. ծնված) աշխատանքներ կատարելիս ընկել է Աղստև գետը:

Մինչև ժամը 02.43-ը փրկարարներն Աղստև գետի երկայնքով (դեպի Ազատամուտ գյուղ) մոտ 600 մետր իրականացրել են որոնողական աշխատանքներ, որը մթության պատճառով դադարեցվել է:

Ժամը 07.33-ի դրությամբ վերսկսվել են որոնողական աշխատանքները, որին մասնակցում է Դիտավան գյուղի 20 բնակիչ:

«Առաջին լրատվական»-ի հետ զրույցում Դիտավանի գյուղապետ Հակոբ Սարիբեկյանը տեղեկացրեց, որ արդեն իսկ գտել են ինժեներական աշխատանքներ կատարողի դին։ Այս պահին ընթանում են դին դուրս բերելու աշխատանքները։