Վայրի բնության լուսանկարիչը «չտեսնված» կադր է ֆիքսել (ֆոտո)

Օրերս վայրի բնության լուսանկարիչներից մեկը կիսվել է մի ուշագրավ լուսանկարով, որն ըստ նրա՝ «մինչ այժմ չհանդիպած» երևույթ է։ Բելգիացի Իվս Ադամսը 2019թ․-ի դեկտեմբերին Հարավային Ատլանտյան օվկիանոսի տարածքում գլխավորում էր երկամսյա լուսանկարչական ուղևորությունը, երբ խումբը կանգ է առել Հարավային Ջորջիայում՝ լուսանկարելու համար ավելի քան 120․000 թագավորական պինգվինների խմբին:

Այդ ընթացքում Ադամսը նկատել է անսովոր տեսարան, որը նախկինում չէր տեսել. Պպինգվին՝ վառ դեղին փետուրներով: Լուսանկարիչը Kennedy News-ի հետ զրույցում ասել է․ «Ես նախկինում երբեք չէի տեսել կամ լսել դեղին պինգվինի մասին։ Այդ լողափում 120․000 պինգվին կար, և այն այնտեղ միակ դեղինն էր»:

Լուսանկարիչներին հաջողությունը կրկնակի է ժպտացել, քանի որ այդ արտասովոր գունավորմամբ պինգվինը հանգրվանել է հենց այնտեղ, որտեղ լուսանկարիչներն են եղել և նրանց հաջողվել է որակյալ լուսանկարներ ստանալ։ 

Ըստ մասնագետների՝ թռչնի նման արտասովոր գունավորումը պայմանավորված է եղել լեյկիզմ կոչվող հանգամանքով, ինչը հանգեցնում է պիգմենտացիայի կորստի: