Ահազանգ՝ «Արմօյլ»-ը շարունակում է կառուցել գործարանը. Ա. Գրիգորյանն անձամբ գործարանում է
Ինչպես տեղեկացրել ենք, օրերս Բնապահպանության և ընդերքի տեսչական մարմնի ղեկավար Արթուր Գրիգորյանը կայացրել է Կոտայքի մարզի Եղվարդ քաղաքի Նատի թաղամասում «Արմօյլ» ՓԲԸ կողմից նավթավերամշակման գործարանի շինարարությունը կասեցնելու մասին որոշում մինչև «Շրջակա միջավայրի վրա ազդեցության գնահատման և փորձաքննության մասին» ՀՀ օրենքով նախատեսված հիմնադրութային փաստաթղթերի շրջակա միջավայրի վրա ազդեցության գնահատումը և փորձաքննության դրական որոշման ստացումը:
Այսօր, սակայն, Եղվարդ քաղաքի Նատի թաղամասի բնակիչներից ստացանք ահազանգ /EcoNews.am բնապահպանական տեղեկատվական կայք/, որ գործարանի շինարարական աշխատանքները շարունակվում են: Նրանցից մեկը մեզ հետ զրույցում նշեց, որ աշխատանքները շարունակվում են և՛ գիշերը, և՛ ցերեկը: «Ոչ միայն աշխատանքներ են տեղի ունենում, այլև նոր աշխատողներ են ընդունում, որպեսզի արագ ընթանա գործը: Ու այդ ամեն ինչը գաղտնի են անում: Այն ժամանակ, եթե մեքենաներն ավելի շատ էին գործարանի դիմաց, այժմ աշխատողները մեքենաներով չեն գալիս, որպեսզի չերևա, որ աշխատում է»,- ասաց քաղաքացին:
Տեղեկությունը ճշտելու նպատակով կապ հաստատեցինք նաև Բնապահպանության և ընդերքի տեսչական մարմնի ղեկավարի մամուլի քարտուղար Վրույր Պեպանյանի հետ, ով մեզ հայտնեց, որ տեսչական մարմնի ղեկավար Արթուր Գրիգորյանն անձամբ այս պահին գտնվում է «Արմօյլ» ՓԲԸ գործարանի տարածքում՝ ծանոթանալու խնդրին: Տեսչական մարմնի աշխատանքների մասին կտեղեկացնենք ավելի ուշ:
Այս թեմայով
«Եթե առյուծ ունեմ, ուրեմն ուժեղ եմ»․ ի՞նչ է սպասվում բանտարկված կենդանիներին /մաս 2/
Հայաստանի անտառներում կարող են կապիկներ հայտնվել․ Lուծումներ փնտրելիս /մաս 1/
«Վայրի առևտուր»․ ֆիլմ վայրի կենդանիների միջազգային առևտրի և Հայաստանի մասին
Ծառուկյանը վերադառնում է որսի
Հայաստանը վայրի տանձենիների գենետիկ բազմազանության համաշխարհային կենտրոններից մեկն է (ֆոտո)
