Հայաստանում մեկնարկել է կլիմայի փոփոխությանը նվիրված «Արևորդի» ֆիլմերի փառատոնը
![](https://econews.am/disk/02-11-22/64766c894269cb73bda90c5538df520a.jpg)
«Արևորդի» 11-րդ միջազգային բնապահպանական փառատոնն այս տարի նվիրված է Երկիր մոլորակին սպառնացող ամենամեծ վտանգներից մեկին՝ կլիմայի փոփոխությանը: Փառատոնի շրջանակում նոյեմբերի 4-8-ը կցուցադրվեն վերջին տարիների բնապահպանական լավագույն 30 ֆիլմերն՝ աշխարհի տարբեր անկյուններից։
Ֆիլմերի ցուցադրման ծրագրին ծանոթացեք հղումով։
«Արևորդի» միջազգային բնապահպանական փառատոնի 2022թ․-ի ֆիլմերի ծրագրի երեք անվանակարգերն են․
- Լիամետրաժ ֆիլմեր կլիմայի փոփոխության մասին
- Կարճամետրաժ ֆիլմեր կլիմայի փոփոխության մասին
- Մանկապատանեկան ֆիլմեր կլիմայի փոփոխության մասին
Փառատոնի շրջանակում առանձին ծրագրով ներկայացված կլինեն նաև ոչ մրցութային բնապահպանական ֆիլմեր։
«Արևորդի» փառատոնի՝ այս տարվա ծրագրի հավելվածներից մեկն է նոյեմբերի 11-14-ը նախատեսված «Կանաչ թղթակիցների դպրոցը»՝ ինտենսիվ ուսումնառության նորաստեղծ հարթակը, որի թիրախում մեդիա ոլորտում ներգրավված երիտասարդների շրջանում Հայաստանում էկո-լրագրության զարգացումն է և բնապահպանական ու կլիմայական խնդիրներին առնչվող թեմաների լուսաբանման որակի բարելավումը:
«Արևորդի» միջազգային բնապահպանական փառատոնը 2007թ․-ին հիմնվել է Վայրի բնության և մշակութային արժեքների պահպանման հիմնադրամի կողմից: Իր տեսակով այն առաջինն ու դեռևս միակն է Հարավկովկասյան տարածաշրջանում։
Հիմնադրման պահից «Արևորդի»-ն կամրջել է բնության պահպանության խնդիրներով մտահոգ տեղական ու միջազգային համայնքի ներկայացուցիչների։ Փառատոնը էկո-ոլորտի շուրջ երկխոսության, իրազեկման, ստեղծագործ լուծումների մշակման հնարավորություն ընձեռող հարթակ է։
2022թ․ «Արևորդի» միջազգային բնապահպանական փառատոնի գործընկերներն են Վիվա-ՄՏՍ-ը, ԱՄՆ Անտառային ծառայությունը, Ֆրիդրիխ Էբերտ հիմնադրամը։
Համաձայն ՀՀ Կլիմայի փոփոխության մասին 4-րդ ազգային հաղորդագրության՝ մեր երկրում դիտարկվող կլիմայի փոփոխության միտումները բարենպաստ չեն․ վերջին տասնամյակների ընթացքում տարեկան միջին ջերմաստիճանի և բնական աղետների հաճախականության և ուժգնության զգալի աճ է արձանագրվել։
Խնդրի լայն իրազեկման, քաղաքացիական գիտակցության ձևավորման շնորհիվ միայն կարելի է կանխել կամ մեղմել Հայաստանում կլիմայի փոփոխության ազդեցության բացասական սցենարները։
Այս թեմայով
![](/timthumb.php?src=https://econews.am/disk/17-10-23/c5edfa7f66ee4c1b568d55f48be94eb9.jpg&w=300&h=200)
![](/timthumb.php?src=https://econews.am/disk/12-09-23/b7c4e686dc359003d758ee55a27af324.jpg&w=300&h=200)
![](/timthumb.php?src=https://econews.am/disk/03-08-23/5f85b80b82d022d0e95410d9fb7523da.jpg&w=300&h=200)
![](/timthumb.php?src=https://econews.am/disk/17-07-23/982c1721f392e11c1ca68d1cced6ea43.jpg&w=300&h=200)
![](/timthumb.php?src=http://econews.am/disk/14-11-22/53668a4135094479e1b121499ec66b4c.jpg&w=300&h=200)