Econews.am | Սեր ու հոգատարություն բնության նկատմամբ՝ երեխաների միջոցով. «Բնասիրական դիմակահանդես 2018» (ֆոտոշարք)

Սեր ու հոգատարություն բնության նկատմամբ՝ երեխաների միջոցով. «Բնասիրական դիմակահանդես 2018» (ֆոտոշարք)

Ուրախ տրամադրություն, երգ ու պար, տարբեր կերպարներում ժպտացող մանուկներ, բնությանը մոտ գտնվելու ևս մեկ հնարավորություն. հունիսի 4-ին Երևանում տեղի ունեցավ ամենամյա «Բնասիրական դիմակահանդես 2018»-ը, որի նպատակն է բնության նկատմամբ սեր ու հոգատարություն քարոզել երեխաների միջոցով։ 

Դիմակահանդեսն անցավ բազում մանուկների և մեծահասակների մասնակցությամբ: Պատանեկության ստեղծագործական կենտրոնի սաները ցուցադրեցին իրենց պատրաստած գեղեցիկ և զվարճալի համարները, ինչպես նաև կազմակերպվեցին տարբեր խաղեր, որոնց միջոցով մանուկները նոր գիտելիքներ ձեռք բերեցին բնության, շրջակա միջավայրի խնամքի մասին:

Միջոցառմանը ներկա էր նաև հաղորդավարուհի Իրինա Թովմասյանն իր գեղեցկուհի դուստրերի հետ, որոնցից երկուսն այս տարի առաջին անգամ են մասնակցում դիմակահանդեսին: Վերջինս մեզ հետ զրույցում անչափ կարևորեց նման միջոցառումների անցկացումը՝ ասելով. «Միջոցառումը շատ եմ կարևորում, որովհետև երեխաների մեջ սերմանել սերը դեպի բնությունն ինձ թվում է շատ կարևոր է: Նման միջոցառումները նախ ոգևորիչ են երեխաների համար, բայց ամենակարևորը որ կրթական նպատակ ունեն»:

Ամեն տարի ներկաներին նոր կերպարով զարմացնող բնապահպան Կարինե Փանոսյանն այս տարի կատվի կերպարում էր: «Նման միջոցառումը երեխաների մոտ թեմատիկ հարցադրում են առաջ բերում, որի արդյունքում երեխան սկսում է մտածել, իսկ ինչու ենք մենք պահպանում բնությունը, ումից ենք պաշտպանում և ինչ խնդիրներ կան: Տարեցտարի մենք հասարակության մոտ տեսնում ենք գիտակցական վիճակի փոփոխություն»,- ասաց նա մեզ հետ զրույցում:

Միջոցառման կազմակերպիչ «Փրո Փոուզ» միջազգային բարեգործական կենդանապաշտպան կազմակերպության հայաստանյան ներկայացուցիչ, ՊՍԿ տնօրեն Նարե Արամյանը մեզ հետ զրույցում ասաց, որ այս տարին չորրորդն է, որ կազմակերպվում է «Բնասիրական դիմակահանդես»-ը, ինչպես փոքրիկների, այնպես էլ մեծերի համար: «Մենք շատ ուրախ ենք, որ այն արդեն ավանդական է դարձել»,- նշում է նա:

Նյութը պատրաստվեց EcoNews.am բնապահպանական տեղեկատվական կայքի կողմից:

Եղանակի տեսություն
Օրացույց
Մենք Facebook-ում