Էկոլոգիապես մաքուր սնունդ հնարավոր չէ ստանալ էկոլոգիապես ոչ մաքուր միջավայրում
ՀՀ-ում արտադրվող մի շարք ապրանքների վրա վերջերս հայտնվել է “էկոլոգիապես մաքուր” գրավիչ արտահայտությունը, չնայած ապրանքատեսակի գինը դրանից գրեթե չի փոխվել: Մինչդեռ ամբողջ աշխարհում իսկապես էկոլոգիապես մաքուր սննդի գինը մի քանի անգամ գերազանցում է էկոլոգիապես ոչ մաքուր արտադրանքի արժեքը:
Շրջելով երևանյան սննդի կետերով` նկատեցինք, որ վաճառվող սննդամթերքները չեն համապատասխանում էկոլոգիապես մաքուր սննդի չափանիշներին: Վաճառակետերում վաճառում են “փոշում կորած” սնունդ, սակայն երբ վաճառողից բացատրություն ենք պահանջում, թե ինչու է վաճառվող սնունդը գտնվում այդ վիճակում, պատասխան է հնչում. “Արագորեն սպառվում է, ծածկելու կարիք չկա”: Ի դեպ, մեր երկարատև զրույցի ընթացքում “էկոլոգիապես մաքուր” սնունդը այդպես էլ մնաց վաճառասեղանին` սպասելով իր սպառողին:
Էկոլոգիապես մաքուր համարվող սնունդը պետք է համապատասխանի բազմաթիվ չափանիշների, որոնցից ամենակարևորները և համազգայինները “Econews”-ի հետ զրույցում առանձնացրեց ԵՊՀ էկոլոգիայի և բնության պահպանության ամբիոնի լաբորատորիայի վարիչ Աստղիկ Դանիելյանը. “Էկոլոգիապես մաքուր սնունդն այն է, երբ վերջնական արտադրանք ստանալու ամբողջ ընթացքում պահպանվում են էկոլոգիական բոլոր նորմերը: Էկոլոգիապես մաքուր սնունդը չի պարունակում իր մեջ այնպիսի վնասակար նյութեր, որոնք թողնում են բացասական ազդեցություն մարդու առողջության վրա: Դրանց ստացման համար չեն կիրառվում քիմիական միացություններ, քիմիական ծագման պարարտանյութեր, թունաքիմիկատներ: Էկոլոգիապես մաքուր սնունդ ստանալու համար պետք է հաշվի առնել նաև աճեցման տեղը, օդի մաքրությունը, ոռոգման ջրերի քիմիական կազմը, արդյունաբերական ազդեցության գոտուց հեռավորությունը: Բացի աճեցման էկոլոգիապես մաքուր պայմաններից, կարևոր է նաև տեղափոխման և վերամշակման ընթացքը”:
“Econews”-ը դիմեց ՀՀ Պետական եկամուտների կոմիտե` պարզելու, թե միջազգային ինչ չափանիշներով է կատարվում սննդի մաքսազերծումը և լիցենզիայի տրամադրումը: Պատասխան նամակում գրված էր. “Մաքսային սահմանով նշված ապրանքատեսակի բացթողումը կախված չէ բնապահպանական որևէ չափանիշից: Սննդի ներկրման մաքսային ձևակերպումների համար որևէ լիցենզիա չի պահանջվում”: Այսինքն` ըստ Պետական եկամուտների կոմիտեի` սնունդը ՀՀ տարածք ներմուծվելիս որևէ ստուգում չի անցնում:
Մարիաննա Հակոբյան
Լուսանկարները` Կարապետ Սահակյանի
For English version click here