Ծովի ձկները սովորում են պլաստմաս ուտել
Օվկիանոսների ձկները փոքր հասակից սովորում են սնվել պլաստմասով, ինչպես երեխաներն են սովորում անառողջ ֆասթֆուդին, հայտնում է BBC-ն:
Շվեդ հետազոտողները հայտնաբերել են, որ օվկիանոսի ջրերում մեծ քանակությամբ պոլիստիրոլի մասնիկների առկայությունն օվկիանոսային պերկեսի մոտ առաջացնում է դա ուտելու սովորություն, որի հետևանքով դանդաղում է նրանց աճը, և նրանք գիշատիչների համար դառնում են ավելի խոցելի:
Վերջին տարիներին Համաշխարհային օվկիանոսում երևում է պլաստմասե թափոնների կոնցենտրացիայի բարձրացման էլ ավելի անհանգստացնող նշաններ: Անցած տարվա հետազոտության համաձայն` ամեն տարի օվկիանոս են ընկնում մինչև 8 միլիոն տոննա պլաստմաս:
Ուլտրամանուշակագույն ճառագայթների, քիմիական պրոցեսների և ալիքների հարվածից մեխանիկական քայքայման ազդեցությամբ այդ պլաստմասե աղբն արագ բաժանվում է մանր մասերի: 5 մմ-ից փոքր մասնիկներն անվանում են միկրոպլաստմասներ, որոնք իրենց մեջ ներառում են կոսմետիկ ապրանքներում օգտագործվող միկրոհատիկները:
Կենսաբանները վաղուց նախազգուշացրել են, որ այդ միկրոմասնիկները կարող են կուտակվել ծովային կենդանիների մարսողական համակարգում և ազատ արձակել թունավոր նյութեր:
ԱՄՆ-ում արդեն արգելված է կոսմետիկայում օգտագործել պլաստմասե միկրոհատիկներ, իսկ Եվրոպայում մեծանում է պայքարը նմանատիպ արգելքի ներմուծման համար:
