Շրջակա միջավայրն աղտոտողը չի տարբերվում խոզից. “Let’s Do It” Armenia

Սեպտեմբերի 15-ին “Let’s Do It” Armenia շարժման շրջանակներում տեղի ունեցած  համահայկական աղբահավաքը    հիմք հանդիսացավ, որ  Երևանի քաղաքապետին կից քաղաքաշինական խորհրդի երիտասարդական հանձնաժողովի նախաձեռնությամբ «Երևանը մեր տունն է» շարունակական  ծրագրի շրջանակներում իրականացվեց շաբաթօրյակ:  Հանձնաժողովի անդամ շուրջ 17 հասարակական կազմակերպությունների 150 ներկայացուցիչներ մաքրեցին Երևանի Կենտրոն, Արաբկիր, Աջափնյակ, Էրեբունի և Ավան վարչական շրջանների պատերին ու սյուներին փակցված հայտարարությունները, կոչերն ու պաստառները:

«Հայաստանի ազգային սկաուտական շարժում» («ՀԱՍԿ») ՀԿ-ի ներկայացուցիչ Աշոտ Սանամյանը պատմում է, որ պաստառների մաքրման աշխատանքներ իրականացնելիս գովազդային պաստառների  տակ  փակցված է, որ  սյան վրա թուղթ փակցնողը  ենթարկվում է  վարչական տուգանքի, ինչը իրականում չի գործում:

«Մաքրման աշխատանքների  ժամանակ զանգել զգուշացրել ենք, որ   դրա համար պետք է պատասխանատվություն կրել:  Որոշ մարդիկ  խոստովանում են , որ տեղյակ  չեն  տուգանքի մասին, իսկ մյուսներն արդարանում են, թե  բոլորն են փակցնում, մենք ինչու չպետք է փաքցնենք»,-ասում է Աշոտ Սանամյանը: Օրենքը  չի գործում, սակայն մարդիկ էլ անբարեխիղճ են»:

Ա. Սանամյանը պատմեց նաև, որ  «Հայաստանի ազգային սկաուտական շարժման»   նախաձեռնությամբ ժամանակին իրականացվեցին Գետառի մաքրման աշխատանքներ, որից  հետո  գետառի մոտ փակցվեց մի մեծ  պաստառ`  խոզի  նկարով, գրված` <<Գետառի մեջ աղբ գցողը նմանվում է խոզի>>:  <<Պաստառը փակցնելուց ընդամենը երկու ժամ անց  այն  հայտնվել էր Գետառի  մեջ: Երևի ինչ-որ մեկը իրեն խոզ զգալով բարկացած  պաստառը նետել է ջուրը>>,- ասում է նա:

Ինչպես econews-ին տեղեկացրեց  «Հայաստանն  առանց աղբի»   նախաձեռնության   մասնակից  Նելլի  Սիսակյանը,  աշխատանքներ են տարվում “Let’s Do It” Armenia շարժումն ամենամյա դարձնելու ուղղությամբ: «Դրա համար անհրաժեշտ է ֆինանսական  աջակցություն: «Համահայկական  աղբահավաքը այդպես էլ պետական հովանավորության  չարժանացավ: Երևի մեր երկրի նախագահը չի կարևորել շարժման գաղափարը>>, - ասում է Նելլի  Սիսակյանը և հույս հայտնում,  որ շարժման շարունակական լինելու դեպքում երկրի նախագահը առաջնային կհամարի երկրի մաքրման անհրաժեշտությունը:

Հիշեցնենք, որ  ՎԱՐՉԱԿԱՆ ԻՐԱՎԱԽԱԽՏՈՒՄՆԵՐԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՍԳԻՐՔի հոդված 116-ում (Երկաթուղային տրանսպորտի միջոցներից օգտվելու կանոնները խախտելը) նշվում է. «Գնացքների վագոնների պատուհաններից ու դռներից աղբ եւ այլ առարկաներ դուրս նետելը` առաջացնում է նախազգուշացում կամ տուգանքի նշանակում սահմանված նվազագույն աշխատավարձի մինչեւ քսան տոկոսի չափով»:

Անցած տարվա հունիսի 1-ի դրությամբ` ավտոմեքենայից աղբ նետելու համար տուգանվել է 1297 մարդ: Հիշեցնենք, որ եթե աղբը նետում է վարորդը, ապա տուգանվում է 5 հազար, եթե ուղևորը` 3 հազար դրամով: Այս տարվա տվյալները econews-ին ՀՀ ճանապարհային ոստիկանությունը կփոխանցի ավելի ուշ:

Սակայն, փաստը մնում է փաստ, որ օրենքը,  եթե  նույնիսկ  գործում է, ապա խնդիրը չի կարգավորվում: Չնայած իրականացվող մաքրման տարբեր միջոցառումներին, երկիրը ընդհանուր առմամբ շարունակում է   մնալ կեղտոտ, քանի որ  աղբի տեսակավորում և վերամշակում իրականացվում է մասնավոր ընկերությունների  կողմից, որոնք նախ և առաջ  աղբը ընդունում են բիզնեսի  տեսանկյունից, իսկ   գիտակից և հոգատար մարդիկ, ովքեր տեսակավորելով հավաքում են աղբը իրենց տանը կամ աշխատավայրում,  ընտրություն չունեն` տեսակավորված աղբը ի վերջո   խառնվում է  մյուս  բնակիչների  հավաքած ընդհանուր աղբին:

Ս. Աբրահամյան