ՀՀ բնության հատուկ պահպանվող տարածքներում զարգացվում է էկոտուրիզմը

Մարտի 30-ին ՀՀ բնապահպանության նախարարի տեղակալ Խաչիկ Հակոբյանի նախագահությամբ տեղի է ունեցել աշխատանքային քննարկում՝ ՀՀ բնության հատուկ պահպանվող տարածքներում (ԲՀՊՏ) 2018թ․ էկոտուրիզմի խթանմանն ուղղված միջոցառումների վերաբերյալ։ Քննարկմանը ներկա էին ՀՀ բնապահպանության նախարարության աշխատակազմի կենսառեսուրսների կառավարման գործակալության պետ Արտեմ Թարզյանը, ՀՀ ԲՀՊՏ-ների տնօրենները և «Հայանտառ» ՊՈԱԿ-ի ներկայացուցիչները: Խ. Հակոբյանն անդրադարձել է ԲՀՊՏ-ներում նոր տեխնոլոգիաների՝ մասնավորապես էլեկտրոնային վճարման համակարգերի ներդրման, կանաչ վիզաների մշակման և կիրառման, տարածքի բարելավման և ազատ հատվածների վարձակալման և էկոկրթական ծրագրերի իրականացման միջոցառումներին։

Աշխատանքային հանդիպմանը քննարկվել են նաև էկոզբոսաշրջային միասնական տեղեկատվական համակարգերի ստեղծման և գովազդային ծրագրերի մշակման, տրանսպորտային կազմակերպությունների, տուր-օպերատորների հետ պայմանագրերի կնքման, ԲՀՊՏ-ներում զբոսաշրջային երթուղիների մշակման, hեծանվային և ձիավարության մշակույթի զարգացման գործընթացներին վերաբերող հարցեր։ Քննարկման ժամանակ հարց է բարձրացվել նաև ԲՀՊՏ-ներում աղբահանության հետ կապված խնդիրներին: Աղբահանությունը պատշաճ և ժամանակին իրականացնելու համար Խաչիկ Հակոբյանն առաջարկել է ԲՀՊՏ-ների տնօրեններին վերանայել կնքված պայմանագրերը աղբահանում իրականացնող կազմակերպությունների հետ։ Հանդիպման մասնակիցների կողմից կարևորել են իրականացվող ծրագրերի արդյունավետության բարձրացումը և դրանցից ակնկալվող եկամուտների աստիճանական ավելացումը։

ՀՀ բնապահպանության նախարարության աշխատակազմի ղեկավարի տեղակալ Աշոտ Ավալյանի մոտ կազմակերպված խորհրդակցության ժամանակ քննարկվել են ԲՀՊՏ-ներում հրդեհների կանխարգելման, հակահրդեհային միջոցառումների ուղղությամբ տարվող աշխատանքներին առնչվող հարցեր։ Աշխատանքային հանդիպմանը մասնակցել են նաև ՀՀ արտակարգ իրավիճակների նախարարության աշխատակիցներ, ովքեր ներկայացրել են մասնագիտական առաջարկներ։

Եղանակի տեսություն
Օրացույց
Ամենադիտված
Այսօր
Այս շաբաթ
Այս ամիս
Մենք Facebook-ում