«Շիկահող» արգելոցի ռեյնջերը կասկածվում է ապօրինի ծառահատումներին մասնակցություն ունենալու մեջ

2017թ. նոյեմբերի 1-ին Սյունիքի մարզի դատախազությունում ստացվել էր ՀՀ բնապահպանության նախարարության բնապահպանության և ընդերքի տեսչական մարմնի Սյունիքի տարածքային բաժնի աշխատակիցների կողմից կազմված` բնապահպանական իրավախախտման վերաբերյալ արձանագրությունը և կից հաշվարկը` Կապան-Մեղրի ավտոմայրուղու 37-րդ կմ-ին հարակից անտառամերձ տարածքում 39 տարբեր տեսակի և տրամագծերի ապօրինի հատված ծառերի վերաբերյալ:

ՀՀ ոստիկանության Սյունիքի մարզային վարչության Կապանի բաժնում նախապատրաստված նյութերով ՀՀ Սյունիքի մարզի դատախազությունում 2017թ. նոյեմբերի 7-ին ՀՀ քրեական օրենսգրքի 296-րդ հոդվածի 3-րդ մասով և 315-րդ հոդվածի 1-ին մասով հարուցվել էր քրեական գործ, որի նախաքննությունը հանձնարարվել էր Սյունիքի մարզային քննչական վարչությանը:

Նախաքննության ընթացքում իրականացված քննչական, դատավարական գործողությունների արդյուքնում ձեռք բերված փաստական տվյալներով պարզվել էր, որ Կապան-Մեղրի ավտոմայրուղու 47-րդ կմ-ին հարակից՝ ՀՀ ԲՆ «Շիկահող» պետական արգելոց ՊՈԱԿ-ին պատկանող տարածքում անհայտ անձանց կողմից ապօրինի հատվել է 30 տարբեր տեսակի և տրամագծի ծառեր, իսկ Սյունիքի մարզի Ծավ համայնքի վարչական տարածքի համայնքային սեփականության հողատարածքում 7 տարբեր տեսակի և տրամագծի ծառեր և ծառի ճյուղեր, ինչի հետևանքով պետությանը պատճառվել է առանձնապես խոշոր չափի` 5.393.466 ՀՀ դրամ վնաս:

Ձեռք բերված բավարար տվյալների համակցությամբ հիմնավոր կասկածներ են առաջացել առ այն, որ ապօրինի ծառահատումներն իրականացվել են «Զանգեզուր կենսոլորտային համալիր» ՊՈԱԿ-ի կազմում ընդգրկված «Շիկահող» պետական արգելոցի տեսուչ Ա. Ն.-ի կողմից առերևույթ ծառայության նկատմամբ անբարեխիղճ կամ անփույթ վերաբերմունքի պատճառով իր պարտականությունները չկատարելու կամ ոչ պատշաճ կատարելու հետևանքով:

Ելնելով վերոգրյալից՝ ՀՀ քրեական օրենսգրքի 315-րդ հոդվածի 1-ին մասով սահմանված հանցավոր արարքն առերևույթ կատարելու կասկածանքով Ա. Ն.-ի նկատմամբ որպես խափանման միջոց է ընտրվել ստորագրություն չհեռանալու մասին:

Նախաքննությունը շարունակվում է, ձեռնարկվում են անհրաժեշտ բոլոր միջոցները՝ դեպքի ամբողջական հանգամանքները բացահայտելու և արգելոցի տարածում ապօրինի ծառահատման հանցագործության մեջ ներգրավված բոլոր անձանց շրջանակը պարզելու ուղղությամբ:

Նշենք, որ նոյեմբեր ամսին EcoNews.am բնապահպանական տեղեկատվական կայքն ահազանգել է ծառահատման դեպքի մասին՝ գրելով. ««Էկո-մեդիա ցանցի» համահիմնադիր Նարինե Կիրակոսյանը մեզ հետ զրույցում նշեց, որ տվյալ տարածքի ռեյնջերն Արգամ Նահապետյանն է, ով էլ պատասխանատու է «Շիկահող» արգելոցի Ծավ համայնքի շրջանում վերահսկողություն իրականացնելու համար: Դեռ 2015թ.-ին նույն այս տարածքում Նարինե Կիրակոսյանն իր գործընկերների հետ եղել է դեպքի վայրում և գրանցել է ապօրինի ծառահատումների դեպք, որի մասին նաև հայտնել է իրավապահ մարմիններին, սակայն մինչ օրս մեղավորներ չեն գտնվել, թեկուզ ըստ համապատասխան մարմնի հաշվարկների բնությանը հասցվել էր մոտ 6 մլն դրամի վնաս»: 

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Եղանակի տեսություն
Օրացույց
Մենք Facebook-ում