Ապօրինի որս, դաժան վերաբերմունք, շնամարտեր... Իջևանի 40-ամյա բնակիչն «անպատժելի՞» է (տեսանյութ, ֆոտո)

Զգուշացում. հրապարկումը պարունակում է դաժանություն ցուցադրող կադրեր: 

Կենդանիների նկատմամբ դաժան վերաբերմունքի, ինչպես նաև ապօրինի որսի մասին փաստող հերթական լուսանկարներն ու տեսանյութն է հայտնաբերվել համացանցում: Տավուշի մարզի Իջևան քաղաք 40-ամյա բնակիչ Սամվել Օհանյանը միանգամից 3 տեսակի հանցագործության մասին վկայող լուսանկարներ ու տեսանյութեր է բեռնել:

Վերջինս բեռնել է տեսանյութ, որտեղ ակնհայտ դաժան վերաբերմունք է դրսևորվում կենդանու նկատմամբ: Սամվել Օհանյանի կողմից տեսանյութը համացանց է բեռնվել 2017թ.-ի հոկտեմբեր ամսին: Մի խումբ մարդիկ հասարակական վայրում հրազենի կիրառմամբ կրակում են շան վրա: Տեսանյութի մասին համացանցում ահազանգել է «Love Animals Hate Hunters» նախաձեռնությունը (տեսանյութը՝ հղումով):

Լուսանկարը՝ Սամվել Օհանյանի էջից:

Նշենք, որ կենդանու նկատմամբ դաժան վերաբերմունքի համար «Վարչական իրավախախտումների վերաբերյալ» ՀՀ օրենսգրքի 92-րդ հոդվածը վարչական պատասխանատվություն է սահմանում:

92-րդ հոդվածն ասում է. «Կենդանիների նկատմամբ դաժան վերաբերմունքը, որը հանգեցրել է դրանց ոչնչացման կամ խեղման, ինչպես նաև կենդանիներին խոշտանգելը` առաջացնում է տուգանքի նշանակում քաղաքացիների նկատմամբ` սահմանված նվազագույն աշխատավարձի երեսնապատիկից մինչև հիսնապատիկի չափով, իսկ պաշտոնատար անձանց նկատմամբ` ութսունապատիկից մինչև հարյուրապատիկի չափով»:

Նշված տեսանյութում առկա են հանցագործության տարրեր պարունակող նաև այլ երևույթներ:

Ուսումնասիրելով Սամվել Օհանյանի կողմից հանրայնորեն հրապարակված մյուս տեսանյութերն ու լուսանկարները, ակնհայտ է դառնում, որ վերջինիս կողմից «խնամվող» կենդանիները ակտիվորեն մասնակցում են նաև շնամարտերի: Նշենք, որ սույն գործունեությունն արգելվում է «Անասնաբուժության մասին» ՀՀ օրենքով: 

Սամվել Օհանյանի էջից բեռնված շնամարտերի մասնակցության մասին տեսանյութը՝ հղումով:

Լուսանկարը՝ Սամվել Օհանյանի էջից:

Բացի այդ, վերջինս նաև 2014թ.-ին հրապարակել է լուսանկարներ՝ գիշատիչ թռչունը ձեռքերում: «Դեպի կայուն էկոհամակարգեր» ՀԿ տնօրեն, կ.գ.թ. Կարեն Աղաբաբյանը մեզ հետ զրույցում նշեց, որ լուսանկարում Մեծ ճուռակ է (Buteo buteo): «Թռչունը ներառված չէ ՀՀ կենդանիների կարմիր գրքում, բայց ունի շատ կարևոր գործառույթ գյուղատնտեսության ոլորտում. վերացնում է կրծողներին»,- ասաց նա:

Լուսանկարը՝ Սամվել Օհանյանի էջից:

Մեծ ճուռակը որսատեսակ չհանդիսացող թռչուն է և տվյալ կենդանու որսը թույլատրված չէ: Տեսակն ընդգրկված է ԲՊՄՄ (IUCN) Կարմիր ցուցակում «Քիչ վտանգված» (Least Concern) կարգավիճակով:

Սույն հրապարակումը հանդիսանում է հաղորդում հանցագործության մասին, ուստի EcoNews.am բնապահպանական տեղեկատվական կայքը հրավիրում է ՀՀ ոստիկանության և մյուս իրավապահ մարմինների, ինչպես նաև Բնապահպանության և ընդերքի տեսչական մարմնի ուշադրությունը:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: