Ինչու՞ է «Վալլեքս»-ը ֆինանսական աջակցություն ցուցաբերել «Գ.Նժդեհ» ֆիլմի ստեղծմանը
Ինչպես հայտնի է, «Վալլեքս» խմբի ընկերությունները ֆինանսական աջակցություն է ցուցաբերել «Գարեգին Նժդեհ» ֆիլմի ստեղծմանը, որի պրեմիերան կկայանա ս.թ.հունվարի 28-ին «Մոսկվա» կինոթատրոնում: Իսկ հունվարի 29-ից ֆիլմը կցուցադրվի Երևանի բոլոր կինոթատրոններում: EcoNews-ը դիմել է «Վալլեքս» խմբի ընկերությունների Տեղեկատվության և հասարակայնության հետ կապերի բաժնի պետ Վահրամ Ավագյանին` պարզելու ընկերության հետապնդած նպատակը:
1. Հարց
Համացանցում տեղ է գտել Գարեգին Նժդեհի մասին պատմող ֆիլմի թրեյլերը, որի վերջնամասում երևում է, որ «Վալլեքս» գրուպը ֆիլմի հովանավորներից մեկն է: Խնդրում ենք մեկնաբանել, թե ինչո՞վ է պայմանավորված, որ ֆիլմը ֆինանսավորվել է հենց «Վալլեքս» խմբի ընկերությունների և «Զանգեզուրի պղնձամոլիբդենային կոմբինատի» կողմից:
Պատասխան.
«Վալլեքս» խմբի ընկերությունները «Պանարմենիան մեդիա գրուպ» ՓԲ ընկերությունից ստացել են Գարեգին Նժդեհի մասին ֆիլմի ստեղծմանը ֆինանսական օժանդակություն ցուցաբերելու առաջարկ, որն ընդունվել է, քանի որ համահունչ է խմբի կորպորատիվ սոցիալական պատասխանատվության շրջանակներում իրականացվող մշակութային ծրագրերին և առաջնահերթություններին:
2. Հարց.
Արդյո՞ք ավելի նպատակահարմար չէ ֆինանսներն օգտագործել բնապահպանական խնդիրների լուծման համար:
Պատասխան.
Կորպորատիվ սոցիալական պատասխանատվության ծրագրերի շրջանակներում «Վալլեքս» խմբի ընկերությունները բնապահպանական ծրագրեր իրականացնում են:
Միևնույն ժամանակ մենք այն համոզմանն ենք, որ կորպորատիվ սոցիալական պատասխանատվության պատշաճ մակարդակի ապահովման ուղղությամբ «Վալլեքս» խմբի ընկերությունների գործողություներում սոցիալական պատասխանատվության համակարգի տարրերը պետք է լինեն հնարավորինս համաչափ ներկայացված, և բնապահպանական, կրթական կամ այլ ծրագրերի իրականացումը կամ օժանդակումը չի կարող նշանակել, որ մշակութային ծրագրեր չեն իրականացվելու կամ օժանդակվելու:
3. Հարց.
Խնդրում ենք նշել, թե որքա՞ն գումար եք նվիրաբերել ֆիլմի ստեղծման համար:
Պատասխան.
Նպատակահարմար չենք համարում գումարի չափի վերաբերյալ տեղեկատվության հրապարակումը մեր կողմից: Համարում ենք նաև, որ արդյունաբերողների սոցիալական պատասխանատվությամբ և (կամ) ազգանպաստ մշակութային ծրագրերի իրականացմամբ շահագրգիռ հանրությանն այս երևույթը պետք է հետաքրքրի ոչ այնքան հատկացված գումարների չափի, որքան՝ տնտեսական և մշակութային գործիչների կողմից ընդհանուր նպատակների գիտակցման ու ազգանպաստ համագործակցության պատրաստակամության տեսանկյունից:
4. Հարց.
Սա միա՞կ ֆիլմն է, որի ստեղծմանն աջակցել է ընկերությունը: Եթե ոչ, խնդրում ենք թվարկել մյուսները:
Պատասխան.
«Վալլեքս» խմբի ընկերություններն աջակցել են ինչպես գեղարվեստական, այնպես էլ փաստագրական նաև այլ ֆիլմերի ստեղծման և (կամ) հանրությանը ներկայացման աշխատանքների: Կարող ենք մասնավորապես նշել գեղարվեստական «Ալավերդի» (ռեժիսոր՝ Մարիա Սահակյան), «Եթե բոլորը» (ռեժիսոր՝ Նատալյա Բելյաուսկենե), փաստագրական «Թեղուտ. զավակների հացը» (ռեժիսոր՝ Տիգրան Պասկևիչյան) և այլ ֆիլմեր:
5. Հարց.
Բնապահպան-ակտիվիստները կարծում են, որ հայրենասիրական բնույթի ֆիլմերի հովանավորմամբ ընկերությունը ցանկանում է իր վարկանիշը բարձրացնել նախագահական ընտրություններից առաջ: Արդյոք այդ խոսակցությունները համապատասխանո՞ւմ են իրականությանը: Ինչպե՞ս կմեկնաբանեք այդ խոսակցությունները:
Պատասխան.
Ինչպես արդեն նշվեց վերոշարադրյալում՝ Գարեգին Նժդեհի մասին ֆիլմի ստեղծմանը «Վալլեքս» խմբի ընկերությունները աջակցել են կորպորատիվ սոցիալական պատասխանատվության մշակութային ծրագրերի շրջանակներում: Եթե դրա արդյունքում ավելի կբարձրանա մեր ընկերությունների խմբի հասարակական վարկանիշը, ապա դա, բնականաբար, ցանկալի հետևանք կլինի մեզ համար: Միևնույն ժամանակ՝ չենք կարող մեկնաբանել այն, թե Ձեր նշած բնապահպան-ակտիվիստների կարծիքով, ի՞նչ կապ կարող լինել մասնավոր ընկերության վարականիշի բարձրացման և Հայաստանում ընթացող քաղաքական գործընթացների, մասնավորապես՝ նախագահական ընտրությունների ժամկետների միջև:
Սաթենիկ Աբրահամյան
ECOnews.am